Шон Диди Комбс во моментов чека судење заради обвинувањата за рекетирање, трговија со луѓе и проституција. Познатиот музички продуцент и рапер, кој во текот на неговата кариера се нарекуваше и П. Диди, Пафи и Паф Деди, беше обвинет во септември 2024 година, откако федералните власти отворија истрага против него. Прашањето што се поставува е - колку време би можел да помине во затвор?
Судењето е закажано за 5 мај 2025 година. Поранешниот њујоршки обвинител и кривичен адвокат Пол Келан изјави за Us Weekly дека казната од „10 до 20 години“ е најверојатна доколку Диди (55) биде осуден.
„Со оглед на сериозноста на обвиненијата, долга затворска казна е речиси неизбежна доколку биде осуден“, рече Келан. „Доколку биде осуден, тој може да очекува да го помине поголемиот дел од својот живот зад решетки. Федералните обвинители обично успеваат во повеќе од 90 % од случаите што ги покренуваат, или преку признавање на вина или осуда по судење“, објаснува тој.
Келен додаде дека обвинителите „претставиле силни докази пред федералните судии дека Комбс може да побегне или да им се заканува на сведоците доколку биде ослободен“.
Адвокатите на осрамотениот рапер рекоа дека во петокот вечерта дознале дека обвинителите имаат привилегиран материјал од адвокат и клиент запленет од затворската ќелија на Диди во притворскиот центар Метрополитен во Бруклин, според судските документи до кои дојде ТМЗ.
Адвокатот на одбраната Марк Агнифило тврди дека материјалот ги вклучува рачно напишаните белешки на Диди до неговиот правен тим во врска со сведоците на одбраната и стратегиите на одбраната за неговото претстојно судење.
Инаку, Диди по трет пат се обидува да биде ослободен со кауција од 50 милиони долари, откако судиите веќе двапати го одбиле неговото барање.
Во последното поднесување, обвинителите тврдат дека Комбс направил „немилосрдни напори да контактира со потенцијалните сведоци, вклучително и жртвите на неговото злоставување, кои би можеле да дадат моќно сведочење против него“.
Раперот е обвинет дека користел шифри за пристап до телефонот, познати како PAC броеви на други затвореници, за да контактира со неколку луѓе, вклучително и неговите синови од затворот, и дека направил „тринасочни повици за да контактира со други лица“.
