По долго боледување, почина новинарката и уредничка во весникот Вечер, Валентина Марјановиќ. Колегите од весникот се простија од неа:
"Си замина Валентина Марјановиќ, нашата драга колешка, истакната новинарка, посветен и врвен професионалец, препознатливо име во весникот ВЕЧЕР, во кој го помина целиот работен век. Се бореше храбро до последен здив, беше пример за јака волја, силна верба и позитива, за борба и одлучност за живот и победа над подмолната болест. Но, за жал, последната битка не успеа да ја извојува.
По долго боледување, почина вчера на 22 ноември, во Скопје.
Нејзината посветеност и визионерски дух ќе останат трајна инспирација на сите нас.
Таа беше дел од весникот ВЕЧЕР од самите почетоци на својот работен век во 1997 година. Читателите ја препознаваа по нејзиниот стил на пишување во повеќе рубрики, Скопска, Црна хроника и Економија. Последната деценија беше уредник на Економија, а обработуваше и теми од здравството. За својата работа беше добитник на многу награди и признанија.
Валентина беше почитувана како голем професионалец и уште поголем пријател. Ќе ни недостасува нејзината блага насмевка и секогаш добар збор, совет. Изгубивме посебен човек, блескава душа каква ретко се раѓа.
Вале, секогаш ќе останеш во нашите срца.
<b>Колегите од редакцијата ВЕЧЕР</b>"
