33 лица ја преживеаја несреќата на летот Ј2-8243 на Азербејџан ерлајнс, во кој се превезуваа 62 патници и пет членови на екипажот од Азербејџан за Русија, објавија во средата казахстанските власти.
Несреќата се случила во близина на Актау на источната страна на Каспиското Езеро, откако авионот наводно се судрил со птица или јато птици - барем така е верзијата на настанот што ја објави Руската агенција за воздухопловство, врз основа на прелиминарни, нецелосни информации.
Пилотот се обидел безбедно да го приземји авионот, се гледа дека непосредно пред падот имало ненадејно спуштање и искачување на леталото, но грубото слетување и експлозијата на крајот за жал не биле избегнати.
Многу работи за самата несреќа остануваат нејасни, како на пример зошто не се обиде итно слетување во Русија веднаш по ударот, дури и кога аеродромите беа затворени поради закани од дронови. Исто така, не е јасно кога точно удрила птицата и во кој дел од авионот (најверојатно моторот) и колку време летал после тоа. Накратко, многу непознати.
Имаше и теории дека не се работи за птица што удрила во авион (или јато птици), туку за експлозија на резервоар за кислород, но нема потврда за тоа.
Во меѓувреме на социјалните мрежи се појавија видеа од самиот авион на кои се гледа како исплашени луѓе се молат. Еден од нив го снимил еден од патниците, кој, според странските медиуми, на крајот ја преживеал несреќата со повреди на лицето.
За потсетување, Азербејџан ерлајнс објави дека авионот Ембраер 190 летал од главниот град на Азербејџан Баку за Грозни, главниот град на руската Чеченија, но бил принуден да изврши итно слетување на околу три километри од казахстанскиот град Актау на брегот на Каспиското Езеро.
Властите во Казахстан соопштија дека е формирана владина комисија за да го истражи инцидентот и дека на нејзините членови им е наредено да полетаат до местото на несреќата за да се погрижат семејствата на загинатите и повредените да ја добијат потребната помош.
Казахстан ќе соработува со Азербејџан во истрагата, соопшти владата.
Азербејџанскиот претседател Илхам Алиев по несреќата се врати дома од Русија, каде што требаше да присуствува на состанокот на врвот во средата, јави руската новинска агенција РИА.
Рамзан Кадиров, чеченскиот лидер поддржан од Кремљ, изрази сочувство и изјава и рече дека некои од хоспитализираните жртви се во исклучително тешка состојба и дека тој и другите ќе се молат за нивно брзо закрепнување.
