Претседателот на грузиската Централна изборна комисија (ЦИК) беше облеан со црна боја за време на состанокот за официјално објавување на резултатите од парламентарните избори на 26 октомври, кои ги оспорува опозицијата.
За време на официјалното објавување на победата на владејачката партија Грузиски сон со 53,93 отсто од гласовите, демонстрантите се собраа пред зградата на комисијата во Тбилиси. Поддржувачите на опозицијата ги отфрлија резултатите поради сомневање дека податоците за исходот од гласањето се фалсификувани. Грузиски сон ги негираше овие обвинувања.
Денешниот состанок беше прекинат откако Давид Киртадзе, член на Изборната комисија од опозициската партија „Обединето национално движење“, го поли со црна боја претседателот Ѓорѓи Каландаришвили.
Пред нападот, Киртаџе му рече на Каландаришвили дека официјалните изборни резултати не го одразуваат „вистинскиот избор“ на гласачите. Претседателот на комисијата одговори дека употребата на „притисок, заплашување и лични напади“ покажува дека нема докази за манипулирање на гласовите.
Набљудувачите на европските избори го опишаа парламентарното гласање во Грузија како спроведено во атмосфера на поделеност и обележано со случаи на поткуп, двојно гласање и физичко насилство.
Властите во Вашингтон и Брисел повикаа на целосна истрага за изборите, додека Кремљ ги отфрли обвинувањата за мешање.
И покрај инцидентот, Централната изборна комисија ги потврди резултатите од изборите. Владејачката партија добива 89 места во 150-члениот парламент. Прозападната опозиција ќе има 61 пратеник.
Според уставот на Грузија, парламентот мора да се состане на првата седница во рок од 10 дена од официјалното објавување на резултатите. /МИА
