Во Европската унија во 2023 година, 7,1 отсто од вработените работеле 49 или повеќе часа неделно, што се смета за долго работно време, покажуваат податоците објавени од Еуростат.
Од земјите на Европската унија, Грција имала најголем удел на работници со долги работни часови, поточно 11,6 отсто, потоа Кипар со 10,4 отсто и Франција со 10,1 отсто.
Најмал удел на горенаведените работници е забележан во Бугарија, 0,4 отсто, како и во Литванија и Латвија, по 1,1 отсто.
Речиси една третина од самовработените, поточно 29,3 отсто од оваа категорија работат 49 или повеќе часа неделно, додека кај вработените овој процент е значително помал и изнесува 3,6 отсто.
Долгите работни часови најчесто се застапени кај квалификуваните работници во земјоделството, шумарството и рибарството, како и кај менаџерите.
Како што пренесува порталот Статиста, вработените со полно работно време во Европската унија работеле во просек по 40,4 часа неделно во првиот квартал од 2023 година.
