Кинеското Министерство за трговија и Царинската управа во кратко соопштение изјавија дека, во согласност со одредбите од Законот за надворешна трговија на Народна Република Кина, воведуваат привремена забрана за извоз на хелиум со непосреден ефект. Причините за таа одлука не беа дополнително објаснети.
Хелиумот е клучен за производство на полупроводници, а се користи и во медицината, на пример за ладење на уреди со магнетна резонанца. Откако започна војната со Иран на крајот на февруари, глобалното снабдување со хелиум е сериозно нарушено, а цените значително се зголемија.
Катар обезбедува една третина од светското производство на хелиум
Според проценките наведени во анализата на консултантската фирма Trivium China, самата Кина произведува околу 15 проценти или помалку од своите потреби за хелиум, додека увезува поголем дел од него од Катар, кој обезбедува околу една третина од светското производство.
„Кина се обидува да ја заштити својата индустрија бидејќи глобалното снабдување со хелиум стана екстремно ограничено“, рече Гари Нг, виш економист во француската банка Натиксис.
„Овој вид мерка за контрола на извозот е првенствено насочена кон заштита на домашната индустрија, особено затоа што хелиумот е клучен за производството на чипови“, објасни Нг. Тој додаде дека целта на мерката е поверојатно да обезбеди доволни количини за домашните потреби отколку да постигне политички цели.
Технолошката конкуренција со САД дополнително се интензивира
Одлуката доаѓа во време кога Кина брзо ги развива своите капацитети за производство на чипови и вештачка интелигенција, додека технолошката конкуренција со САД се интензивира.
Камерон Џонсон, виш партнер во консултантската фирма „Тидалвејв Солушнс“ со седиште во Шангај, рече дека не е познато кога глобалното снабдување со хелиум ќе се врати во нормала. „Фактот дека Кина сега го забрани извозот ми кажува дека тие проценуваат дека едноставно нема доволно хелиум за сè што сакаат да постигнат“, рече Џонсон.
Сепак, Гари Нг истакнува дека Кина не е голем извозник на хелиум, па затоа „оваа одлука веројатно нема да има значаен глобален ефект“, иако поради постојните прекини во снабдувањето, таа би можела дополнително да го зголеми притисокот врз светскиот пазар.
