Понатамошните ископувања покажале дека на местото биле закопани 150 мажи, најверојатно воини убиени во битка. Првичните резултати сугерираат дека гробницата датира од 92 година од нашата ера и може да промени сѐ што е познато за раната историја на австриската престолнина.
„Ова е уникатно европско и глобално откритие“, рече Вероника Кауп-Хаслер, градски советник задолжена за култура и наука, според „Кронен Цетунг“.
Ова, додаваат, е мислење и на други археолози кои учествувале во ископувањата и анализата на откритијата.
Во времето кога била создадена гробницата - околу 92 година од нашата ера - римскиот воен логор Виндобона се наоѓал на местото на денешната прва област во Виена. Археологот Микаела Кронбергер од виенскиот музеј и Кристина Адлер Волф, градскиот археолог, наведуваат дека е јасно дека се работи за скелети на војници, мажи на возраст од 20 до 30 години, а на телата и денес се видливи повреди, од исекотини и убоди до удари од проектили, пренесува Vienna.at.
Како што е наведено, никој не очекувал локалитет од времето на Римската империја на ова место. Особено затоа што кремирањето било пракса тогаш. Заклучокот е дека погребот бил извршен набрзина. Многу е веројатно дека ова е ерата на војните меѓу Римјаните и германските племиња од 86 до 96 година од нашата ера, кога е забележана загубата на цела легија.
