Инцидентот се случил кон средината на минатиот месец, кога маж со презиме Ванг, ентузијаст за нуркање во 40-тите години од општината Фуронг, исчезнал само пет минути откако нурнал во река со пријател, објави „Саут Чајна Морнинг Пост“, пренесе Телеграф.
Влезот во сложениот пештерски систем, кој се наоѓа во река длабока неколку десетици метри, е околу девет метри под површината.
Полицијата веднаш започнала потрага и побарала помош од спасувачкиот тим Шугуанг од Сјангси, како и од специјалните единици од полицијата од градот Баис во автономниот регион Гуангси во јужна Кина.
Специјализираниот нуркачки тим извршил две мисии во пештерскиот систем, но првичните обиди да го пронајдат исчезнатиот нуркач биле неуспешни.
За време на втората потрага, спасувачите слушнале звук што звучел како тропање на карпа.
Спасувачите го исклучиле моторот на бродот за да ги подобрат условите за слушање, но звукот не се повторил.
Нуркањето продолжило до длабочина од околу 130 метри, но немало трага од Ванг.
Пресвртницата се случила за време на искачувањето, на длабочина од околу 100 метри, кога тимот забележал знаци на човечко присуство.
Кога нивото на кислород во делот од пештерата во кој се наоѓал се намалило на само четири проценти, Ванг скокнал во водата и мавтал со фенерче кое успеал да го држи наполнето.
Токму овој сигнал му овозможил да го откријат во успешната операција за спасување, објаснува „Саут Чајна Морнинг Пост“.
Ванг преживеал наоѓајќи засолниште во шуплив дел од пештерата исполнет со воздух, што му овозможило да дише и покрај големата длабочина.
Откако бил пронајден, првото нешто што ги прашал спасувачите било: „Дали имате цигара?“, пишува кинескиот весник. Подоцна рекол дека целосно го изгубил чувството за време и преживеал јадејќи сурова риба. И покрај деновите поминати во подводната пештера, Ванг бил во добра здравствена состојба, според локалните медиуми, и излегол од чамецот и влегол во амбулантно возило без потреба од носилка.
