Млад член на изолирано домородно племе, кој стапил во контакт со локалното население во бразилскиот Амазон, се вратил во своето племе по помалку од 24 часа, објавија бразилските власти.
Средбата се случила во средата во населбата Бела Роса, во југозападниот дел на Амазонија, кога младото момче најверојатно барало огин, пренесува АП.
Мештаните се обиделе да го научат момчето како да користи запалка, но не успеале.
Претставниците на бразилската агенција за домородните народи (Фунаи) брзо пристигнале и привремено го однеле момченцето на безбедно место.
Младото момче потоа доброволно се вратило во шумата.
Фунаи испрати тим од лекари да проверат дали момчето заболело од некоја болест на која изолираните племиња немаат имунитет. Исто така, беше поставена заштита за да се спречи понатамошна комуникација со племето. Бразил, во согласност со својата политика, не бара контакт со изолирани племиња, туку воспоставува заштитени подрачја каде се следи нивниот живот.
