Суспендирани се неколку вработени во американската Федерална агенција за управување со вонредни состојби (ФЕМА) откако потпишаа отворено писмо за некомпетентноста на раководството на агенцијата, наведува непрофитна група која го објави писмото на својата веб-страница.
Ваквиот развој на настаните веројатно ќе ја поттикне загриженоста дека администрацијата на американскиот претседател Доналд Трамп нема да толерира несогласување.
Агенцијата за заштита на животната средина на САД во јуни суспендираше 139 вработени откако потпишаа писмо во кое ги критикуваат политиките на Трамп.
- Можеме да потврдиме дека повеќе вработени во ФЕМА кои јавно ја потпишаа „Декларацијата Катрина“ се ставени на административен одмор, соопшти непрофитната група Stand Up for Science во соопштение испратено по е-пошта.
Не беше прецизирано колку вработени се суспендирани.
„Вашингтон пост“ претходно објави дека до вчеравечер канцеларијата на администраторот на ФЕМА испратила неколку писма до луѓето со кои ги известува дека веднаш одат на административен одмор, „на статус на отсуство од работа, а продолжуваат да примаат плата и бенефиции“.
Десетици актуелни и поранешни вработени во американската агенција за одговор при катастрофи во понеделникот со писмо го предупредија Конгресот дека неискуството на високите функционери на администрацијата на Трамп може да доведе до катастрофа на ниво на Катрина.
Веб-страницата „Stand Up for Science“ наведе дека до вчеравечер писмото го имале потпишано повеќе од 190 вработени.
„ Уште еднаш гледаме како федералната влада се одмаздува на нашите јавни службеници за критиките - што е и нелегално и длабоко предавство на најпосветените меѓу нас“, соопшти групата.
Портпаролот на ФЕМА во понеделникот изјави дека агенцијата е оптоварена со бирократија и неефикасност и дека администрацијата на Трамп „одговорноста и реформите ги направија приоритет“.
Само годинава преку откази, отпремнини или предвремени пензионирања ФЕМА ја напуштиле околу 2.000 вработени или една третина од нејзината работна сила. Администрацијата на Трамп, исто така, планира да го намали финансирањето од грантови за околу една милијарда долари.
Протестното писмо беше испратено неколку дена пред 20-годишнината од ураганот Катрина, кој во август 2005 година предизвика катастрофални поплави во Њу Орлеанс и тешки уништувања по должината на брегот на Мексиканскиот Залив, при што загинаа повеќе од 1.800 луѓе.
Ураганот Катрина беше една од најлошите природни катастрофи во историјата на САД, делумно поради неефикасниот одговор на него.
Во 2006 година, по катастрофата со Катрина, американскиот Конгрес го усвои Законот за реформа на вонредни ситуации за да ѝ даде на ФЕМА поголема одговорност.
