Бронлунд (18), родена во Нуук и поранешна ракометарка на националниот тим на Гренланд, се породила на 11 август во болница во близина на Копенхаген, каде што живее со своето семејство, а само еден час по породувањето, локалните власти ја однесоа нејзината ќерка во згрижувачко семејство, објавува денес „Гардијан“.
Оттогаш, Ивана го видела детето само еднаш, еден час, без да може да го допре или пресоблече.
Иако законот со кој се забранува употребата на PKU тестот кај лица од инуитско потекло стапи на сила во мај, Бронлунд го направила тестот во април, а резултатите биле објавени во јуни, кога забраната веќе била на сила.
Општината ја оправдала одлуката велејќи дека Ивана наводно „не е доволно гренландка“ за да биде опфатена со новиот закон, иако двајцата нејзини родители се Гренландци, според „Гардијан“. Причината за отстранување на детето беше тоа што таа била жртва на сексуална злоупотреба што ја претрпела од нејзиниот очув, кој сега е во затвор.
Министерката за социјални работи Софи Хесторп Андерсен изрази загриженост и побара итно објаснување од општината.
„Законот е јасен, стандардизирани тестови не треба да се користат во случаи на гренландски семејства“, рече таа, додавајќи дека наместо тоа треба да се консултира специјализираното советодавно тело VISO.
Случајот предизвика бран протести во Гренланд, а се планирани и понатамошни собири во Нуук, Копенхаген, Рејкјавик и Белфаст.
Активистите велат дека тоа е расистички и колонијален третман на гренландските мајки.
Ивана рече дека три недели пред раѓањето ѝ било кажано дека нејзиното дете ќе биде одземено.
„Не сакав да се породам затоа што знаев што доаѓа. Срцето ми е скршено, не знам како да живеам без неа“, рече таа низ солзи.
Бронлунд моментално има право да го гледа бебето двапати месечно по два часа, под надзор.
Постапката за жалба е закажана за 16 септември.
