Државната агенција Анадолија објави дека главниот обвинител на Истанбул наредил апсење во рамки на истрага за наводи за изнуда, поткуп, проневера и местење тендери во истанбулскиот округ Бајрампаша.
Градоначалникот на Бајрампаша, Хасан Мутлу, ги негираше обвинувањата во изјава на социјалната мрежа Икс, нарекувајќи ги апсењата „политички операции и неосновани клевети“. „Бидете уверени дека заедно со вас, ценетите жители на Бајрампаша, ќе ги надминеме овие клевети и неправедни постапки“, изјави Мутлу.
Во изминатите месеци, повеќе од десет функционери од главната опозициска Републиканска народна партија (ЦХП) и стотици општински службеници се уапсени поради наводи за корупција, вклучувајќи го и градоначалникот на Истанбул, Екрем Имамоглу. Апсењето на Имамоглу, кој се смета за главен ривал на претседателот Реџеп Тајип Ердоган на следните претседателски избори, предизвика масовни протести.
ЦХП тврди дека апсењата и обвинувањата се дел од офанзивата на државната власт за слабеење на опозицијата и расчистување на теренот за уште пет години владеење на Ердоган. Властите ги отфрлаат овие тврдења, истакнувајќи дека турските судови се независни.
Во клучен случај што ќе се разгледува в понеделник, Судот треба да одлучи дали да го поништи Конгресот на ЦХП од 2023 година, што би можело да го промени раководството на партијата и да ја ослаби. ЦХП на минатогодишните локални избори постигна значителен напредок.
