Чешката Република го идентификуваше нападот како извршен од хакерска група која работи под името Напредна постојана закана 31 (APT31), која е поврзана со Министерството за државна безбедност на Кина, се вели во соопштението на ЕУ.
Според чешкото Министерство за надворешни работи, нападот се случил во 2022 година.
ЕУ остро ги осудува нападите
„Во последните години, злонамерните кибер активности поврзани со оваа земја се зголемија, насочени кон ЕУ и нејзините земји-членки“, се вели во соопштението на 27-те членки на ЕУ.
ЕУ остро ги осуди кибернападите, повикувајќи ја Кина да се воздржи од такво однесување.
„Европската Унија ја потврдува својата силна посветеност на спречување, одвраќање и соодветно реагирање на злонамерното однесување во киберпросторот и е подготвена да преземе дополнителни мерки кога е потребно“, се вели во соопштението.
НАТО: Решени сме да се спротивставиме на заканите
„Остро ги осудуваме злонамерните сајбер активности насочени кон поткопување на нашата национална безбедност, демократските институции и критичната инфраструктура“, се вели во посебно соопштение од НАТО, кое го сочинуваат 32 земји-членки.
„Злонамерните сајбер активности насочени кон Чешката Република истакнуваат дека сајбер-просторот може да биде цел на напад во секое време и со растечка загриженост ја следиме зголемената фреквенција на злонамерни сајбер активности што потекнуваат од Народна Република Кина. Решени сме да се спротивставиме на целиот спектар на сајбер-закани со цел да се поддржуваме едни со други“, се вели во соопштението на НАТО.
