Според Министерството за обединување во Сеул, рибарите повеќепати изразиле желба да се вратат во Северна Кореја. Четворица од нив биле спасени во мај во Источното Море, познато и како Јапонско Море, додека другите двајца биле спасени во март во Жолтото Море.
Рибарите утрово биле качени на дрвен чамец, кој ги однел назад до де факто поморската граница со Северна Кореја.
Репатрирањето на севернокорејски граѓани во нивната татковина е ретко, а нивната судбина таму не може независно да се потврди. Јужнокорејските организации за човекови права го критикуваа планираното враќање. Според „Кореа Тајмс“, активистот Питер Јунг од невладината организација „Правда за Северна Кореја“ изјавил дека намерата на рибарите требало да се потврди во присуство на Агенцијата за бегалци на ОН или други агенции на ОН во Сеул. - Тешко е да се верува дека сите шестмина сакаат да се вратат во Северна Кореја, додаде тој.
Јужнокорејскиот претседател Ли Џае Мјунг, кој е на функцијата од 4 јуни, вети подобрување на затегнатите односи со Северна Кореја.
Локалните медиуми го гледаат репатрирањето како гест на добра волја кон Пјонгјанг. Тензиите меѓу двете корејски нации, кои официјално се сè уште во војна од конфликтот во 1950-тите, се зголемија долж демилитаризираната зона и поморската граница.
