Во Босна и Херцеговина најтешка е ситуацијата на север и северозапад од Република Српска.
Во Градишка повеќе од 70 домаќинства се поплавени поради покачувањето на водостојот на реката Сава, а оштетени се три моста. Тешка е ситуацијата и во Приједор каде е прогласена вонредна состојба од поплави.
Во текот на изминатата ноќ поплавени се околу 350 објекти, станбени и помошни, соопштија од Градската управа на Приједор. Пожарникарите извршиле 12 евакуации, а две семејства привремено се сместени во хотел.
Водостојот на реките Сана и Гомјеница во текот на ноќта порасна и реките се излеаа во населените места Гомјеница и Тукови, каде што беше поплавено пошироко подрачје.
Состојбата е особено критична во Гомјеница.
На фотографии и видеа од социјалните мрежи се гледаат само куќи меѓу кои нема ни педа земја.
Водата практично поплави сè, така што предметите изгледаат како мали островчиња во морето. Под вода е и црквата Света Петка во Гомјеница.
