Работите на изградба на нов нафтовод меѓу Србија и Унгарија би можеле да почнат на крајот на оваа година или на почетокот на следната година и да бидат целосно завршени во 2028 година, изјави денеска во Белград министерот за надворешни работи на Унгарија, Петер Сијарто, по средбата со министерката за енергетика, Дубравка Ѓедовиќ Хандановиќ, јави дописникот на МИА од Белград.
Тој нагласи дека во Унгарија е завршена физибилити студијата, а МОЛ веќе ја презентирал пред владите на двете земји.
„Се надеваме дека работите би можеле физички да започнат на крајот на годината или на почетокот на следната година. До 2028 година би можеле да имаме комплетен нафтовод меѓу двете земји што би бил во функција“, рече Сијарто.
„Треба да се изгради целосно нов нафтовод од рафинеријата во Сасаломбата до границата на Унгарија и Србија во должина од 190 километри, што ќе чини околу 130 милијарди форинти“.
„Тоа е многу сериозна инвестиција која е значајна за целиот регион. Капацитетот на тој нафтовод ќе биде меѓу четири и пет милиони тони годишно и со тој капацитет ќе можеме да ја снабдуваме Рафинеријата во Панчево, што е од клучно значење од аспект на енергетската безбедност на Србија“, рече Сијарто.
Тој додаде дека со тој проект - Србија ќе може целосно да се снабдува со нафта од Унгарија.
Министерката за рударство и енергетика во Србија, во технички мандат Дубравка Ѓедовиќ Хандановиќ изјави дека дел од техничката документација за изградба на нафтоводот меѓу Србија и Унгарија е готова, и до крајот на годината е можно да почнат работите.
„Од наша страна веќе се завршени одредени технички подготовки, како што се донесувањето на просторниот план...Нашите заеднички напори на тој проект се доказ дека сакаме да ја продолжиме, прошириме и зајакнеме нашата соработка во снабдувањето со нафта преку нов правец на снабдување“, рече министерката.
Нафотводот на српска територија ќе биде долг 113 километри.
