Во покраината Карабук, околу 200 километри северно од главниот град Анкара, шумски пожар, кој сега е во шестиот ден, предизвика евакуација на повеќе од десетина села и изгоре големи површини шума, покривајќи ја областа со густ чад, објави Ројтерс.
Во западната турска покраина Бурса, тројца пожарникари загинаа во сообраќајна несреќа во неделата, соопшти турското Министерство за шумарство.
Во последните недели, Турција се бореше со десетици пожари поради екстремна топлина, а 10 пожарникари загинаа минатата недела борејќи се со пожар во централната покраина Ескишехир.
Жешките, суви лета станаа вообичаени во медитеранскиот регион, но интензивните топлотни бранови во последните години доведоа до разорни пожари, истакнува Ројтерс.
Во Албанија, пожарникарите се борат со пожар во близина на Саранда и други туристички одморалишта покрај Јонското Море, со помош на армијата, каде се евакуирани туристи.
Во текот на изминатите три дена, локалната полиција соопшти дека 13 лица се уапсени под сомнение дека ги предизвикале пожарите.
Бугарија распореди противпожарни авиони за да им помогне на копнените сили да го изгаснат големиот пожар во пошумена област на југозападот од земјата, додека во Грција, бројни села беа евакуирани, а пет лица беа повредени во одделни пожари за време на викендот, предизвикани од неподносливата топлина и силните ветрови.
