Според научниците, секојдневно во нашите бели дробови може да влезат повеќе од 70.000 честички од миктопластика, што е значително повеќе од она што досега се веруваше. Уште позагрижувачки е фактот дека повеќето од овие честички се доволно мали за да навлезат длабоко во белодробното ткиво, пишува ScienceAlert.
Пластиката стана еден од најактуелните еколошки проблеми на нашето време, загадувајќи сè, од водните патишта до нашите крвни садови. Ситните честички ги внесуваме во нашите тела не само преку храната и пијалаците, туку и преку воздухот што го дишеме.
Француска студија открива алармантни бројки
Научниците од Универзитетот во Тулуз во Франција спроведоа студија за прецизно мерење на количината на пластична прашина што ја вдишуваме. Тимот анализирал 16 примерока воздух од домови и автомобили користејќи раманова спектроскопија.
Резултатите изненадиле. Просечната концентрација во становите била 528 честички микропластика на еден кубен метар, додека во автомобилите оваа бројка скокнала на неверојатни 2.238 честички. Дури 94 проценти од овие честички биле помали од 10 микрометри, што им овозможува длабоко да навлезат во белите дробови.
100 пати повеќе од претходните проценки
Врз основа на овие податоци, тимот проценил дека возрасен човек во затворен простор вдишува околу 71.000 честици микропластика секојдневно, од кои 68.000 се помали од 10 микрометри.
„Концентрацијата што ја откривме е 100 пати поголема од претходните екстраполирани проценки“, наведуваат авторите на студијата. „Луѓето поминуваат просечно 90 % од своето време во затворен простор, вклучувајќи домови, работни места, продавници, транспорт итн., и сето тоа време се изложени на микропластично загадување преку вдишување без дури и да помислат на тоа.“
Кои се здравствените последици?
Иако сè уште не е сосема јасно што точно микропластиката им прави на нашите тела, научниците се сомневаат дека последиците се далеку од безопасни. Неодамнешните истражувања ја поврзаа изложеноста на микропластика со зголемен ризик од одредени видови на рак, проблеми со плодноста, мозочен удар и мноштво други здравствени проблеми.
Затоа, итно се потребни повеќе истражувања за да се утврдат биолошките ефекти на овие честички, како и пронаоѓање начини за намалување на изложеноста. Истражувањето е објавено во списанието PLOS One.
