Vreme.mk - Дознај на Време.

Живот

Астероид со големина на зграда ќе пројде меѓу Земјата и Месечината

24 март 2023
vesnik-fb-blue
vesnik-twitter-blue
Slika

Релативно мал астероид со дијаметар од 70 метри утре ќе помине близу до Земјата, на половина растојание до Месечината.

Астерoидот 2023 дз2 утревечер прво ќе помине на растојание од 515.000 километри од Месечината, а неколку часа подоцна потоа ќе се приближи на 68.000 километри од Земјата, без да предизвика какви било проблеми. Разминувањето само ќе биде ретка можност за астрономите одблизу да ја проучат вселенската карпа голема колку зграда.

– Нема шанси „градоубиецот“ да ја погоди земјата, но приближувањето ни отвара одлична можност за набљудување – изјави Ричард Моисл, шеф за планетарна безбедност на Европската вселенска агенција. Проектот Виртуелен телескоп ќе го следи движењето на астероидот и ќе го пренесува во живо.

Астрономи од Мрежата за предупредување на астероиди истакнуваат дека е многу ретка појава карпа со вакви димензии да се приближи толку близу до нашата планета. Тие додаваат дека 2023 дз2 повторно ќе се приближи до Земјата во 2026 година, но повторно ќе нѐ промаши.

Астероид со дијаметар од 70 метри и со брзина од 28.000 километри на час би можел да направи голема штета ако директно удри во Земјата. Астероидот не би согорил целосно во атмосферата и би ослободил енергија што може целосно да збрише цел град, еквивалентна на 15 мегатони, односно колку детонација на 1.000 атомски бомби како онаа фрлена врз Хирошима. Со слични димензии бил астероидот што удри во сибирскиот регион Тунгуска во јуни 1908 година. Според проценките, просечната фреквентност на таквите удари е еднаш на 1.900 години.

 

© Сите права на објавата се на Vreme.mk

ПРОФИЛ