Украинскиот претседател Володимир Зеленски синоќа изјави дека предложениот мировен план, кој моментално се разгледува со САД и Европа, содржи „правилни точки“, но дека чувствителните прашања ќе бидат дискутирани директно со американскиот претседател Доналд Трамп.
Во своето вечерно видеообраќање Зеленски посочи дека по преговорите во Женева бројот на точки се намалил од 28 и дека во новата рамка се вклучени многу „правилни елементи“.
-Во моментов, по (разговорите во) Женева, точките се помалку, повеќе не се 28, а многу точни елементи беа вклучени во оваа рамка, рече Зеленски. - Нашиот тим уште денеска извести за новиот нацрт на чекорите и ова е навистина правилниот пристап. Чувствителните прашања, најделикатните точки, ќе ги разговарам со претседателот Трамп, додаде тој.
Зеленски додаде дека процесот на подготовка на конечниот документ ќе биде тежок и дека Украина ја цени поддршката од другите земји, како и „конструктивниот пристап“ на САД.
Зеленски предупреди дека во интерес на Русија е нарушување на мировниот процес и апелираше украинските граѓани да обрнат особено внимание на предупредувањата за воздушни напади во наредните денови и недели.
Тој нагласи дека доколку продолжат преговорите за прекинување на војната, „не смее да има ракети, ниту масивни напади врз Украина и нашиот народ, а тоа е нешто што силните во светот можат да го гарантираат“.
