„На линијата Варшава-Лублин (село Мика) се случи чин на саботажа. Експлозијата на експлозивна направа ја уништи железничката линија“, напиша Туск на X, пренесува агенцијата ПАП.
Штетата е на железничката инфраструктура во областа Жичина, а според полицијата во таа област, прелиминарниот преглед на пругата открил штета на еден дел, предизвикана од експлозијата.
Заменик-министерот за внатрешни работи и администрација Мацеј Душчик, зборувајќи за случајот, рече дека Полска веќе некое време се соочува со различни видови саботажи.
„Ова може да биде една од тие саботажи. Не ја исклучуваме на никаков начин. Имаме штета на пругата, а пругата не се оштети сама. Службите работат, Агенцијата за внатрешна безбедност работи, полицијата работи и обвинителството работи. Мислам дека ќе има повеќе информации за ова прашање утре или задутре“, рече Душчик.
Тој апелираше да не се обвинува Русија за секоја акција.
„Бидејќи Русија не е толку моќна за да предизвика секое палење, секоја ситуација од ваков вид. Сепак, тоа не може да се исклучи или игнорира на кој било начин“, рече Душчик.
Штетата на пругата ја пријавил машиновозачот вчера во 7:39 часот наутро, а во времето на инцидентот, во возот имало двајца патници и неколку вработени, од кои никој не бил повреден.
