Она што требаше да биде одмор од соништата заврши со голема трагедија. Мајка и две мали деца од Германија починаа во Истанбул, а таткото до денеска беше на интензивна нега. Германските медиуми објавија дека и тој починал. Полицијата бара во сите правци, објави ДВ.
Медиумите првично пишуваа дека семејството било отруено од расипани полнети школки, популарна улична храна во турската метропола. Во меѓувреме, други медиуми пишуваат и за нелегални инсектициди што се користат во хотелот каде што престојувало четиричленото семејство од Хамбург.
Оваа теорија е поткрепена со фактот дека неколку други гости на истиот хотел оттогаш завршиле на лекување, објавува Дојче веле. Германските медиуми објавуваат изјава од локален лекар, кој наведува дека хотелот бил дезинфициран од бубачки во креветите.
Властите оттогаш го евакуирале хотелот во населбата Фатих и ја запечатиле зградата. Гостите се преместени. Според официјалните бројки од петокот, нема невообичаено зголемување на случаите на труење со храна во Истанбул.
Уапсени осум осомничени
Според извештаите на медиумите, во меѓувреме се уапсени единаесет осомничени, вклучувајќи четворица улични продавачи на храна во петокот, уште тројца во саботата, вклучувајќи го менаџерот во хотелот, пекар од околината на хотелот и денеска уште двајца вработени во хотелот.
Тие треба да бидат изведени пред истражен судија. Не е јасно дали апсењата се поврзани. Властите првично одбија да коментираат.
Таткото, мајката, шестгодишниот син и тригодишната ќерка, семејство со турско потекло од Хамбург, отпатувале во Истанбул пред една недела. Во среда, семејството било примено во болница под сомнение за труење со храна поради гадење и повраќање и накратко биле отпуштени.
Откако нивната состојба се влошила, целото семејство било вратено во болница преку ноќ. Кратко потоа, двете деца починале, а потоа во петокот, мајката почина. Таткото бил на интензивна нега и исто така починал денеска.
Неостварен сон
Таткото на починатата жена рече дека се надевал на добри вести за својот зет. Семејството доаѓало во Турција секоја година на одмор. Ова лето, тие го украсиле и реновирале поткровјето на семејниот стан во нивниот роден град Болдавин.
- Планирале да се преселат тука. Ова бил нивниот сон - рекол таткото на починатата жена.
Со повеќе од 19 милиони туристи годишно, Истанбул е една од најпосетуваните метрополи во светот.
Туристичката канцеларија зборува за тоа како градот целосно се опоравил по терористичките напади и политичките немири во последните години. Според германските медиуми, хигиенските стандарди во рестораните се исто така зајакнати во последните години.
