Украинските опозициски лидери ја отфрлија идејата за одржување избори за време на војна, по извештаите во медиумите за нивните контакти со американски официјални претставници и откако претседателот Доналд Трамп го нарече својот украински колега Володимир Зеленски „диктатор“ што не ги одржал.
Поранешниот украински претседател Петро Порошенко рече дека неговиот тим работи со американските „партнери“ за да ја одржи поддршката за Украина, но додаде дека се противи на изборите за време на војна. Во писмената изјава објавена на Телеграм, Порошенко наведува дека изборите треба да се одржат само откако ќе се воспостави мир.
Тој нагласи дека гласањето треба да се одржи најдоцна 180 дена по завршувањето на војната.
Јулија Тимошенко, друг опозициски лидер, рече дека нејзиниот тим „разговара со сите наши сојузници кои можат да помогнат да се обезбеди праведен мир што е можно поскоро“ и рече дека изборите не треба да се одржат пред тоа да се постигне.
Политико објави дека четворица високи членови на внатрешниот круг на Трамп разговарале со водечките политички противници на Зеленски. Разговорите се одржани со Тимошенко и високи членови на партијата на Порошенко, кој беше претседател од 2014 до 2019 година, објави Политико, повикувајќи се на тројца украински пратеници и републикански експерт за надворешна политика на САД.
Дискусиите се фокусираа на тоа дали Украина би можела да одржи предвремени претседателски избори, се вели во извештајот. Сепак, според украинскиот закон, изборите не можат да се одржат во време на војна.
Политичкото ривалство меѓу Порошенко и Зеленски датира години наназад. Минатиот месец Зеленски одобри санкции против Порошенко поради, како што изјави државната разузнавачка агенција како „причини за национална безбедност“, без да наведе детали. Порошенко рече дека потегот е политички мотивиран.
