Раните фази од годишните вежби Хан Куан ќе се фокусираат на тестирање како војската на Тајван може да ја децентрализира командата во случај на катастрофален напад врз комуникациите. Во текот на следните 10 дена, вежбите постепено ќе го прошират својот опсег за да ја проценат борбената подготвеност на Тајван против целосен обид за преземање на островот.
-Учиме од ситуацијата во Украина во последните години и размислуваме за тоа со што би можел да се соочи Тајван... во вистинска борба, рече висок одбранбен функционер, нагласувајќи ја потребата од заштита на командните и комуникациските системи. Командантите треба да размислат за тоа со какви проблеми би можеле да се соочат нивните војници и да ги соопштат тие работи на своите подредени, рече функционерот.
Кибер нападите и кампањите за дезинформации Тајван ги смета за активности со висок интензитет на „сива зона“ кои веројатно ќе претходат на поголем кинески напад.
Годишните вежби Хан Куан оваа година ќе мобилизираат најголем број резервни војници, околу 22.000, и за прв пат ќе вклучуваат нови високомобилни артилериски ракетни системи HIMARS произведени од американската компанија Lockheed Martin, заедно со сопствените ракети земја-воздух Sky Sword.
Кина го смета демократски управуваниот остров Тајван за своја територија и го зголеми воениот притисок околу островот во текот на изминатите пет години, вклучително и серија воени вежби. Пекинг никогаш не се откажал од употребата на сила за да го стави островот под своја контрола, а секој напад врз Тајван би можел да предизвика поширока регионална војна.
