Директорот на руската служба за надворешно разузнавање (СВР), Сергеј Наришкин, објави дека разговарал по телефон со шефот на американската ЦИА, Џон Ратклиф, што е втор официјален разговор меѓу двајцата мажи по првиот во средината на март и во услови на сè поочигледно зближување меѓу Москва и Вашингтон.
„Разговарав по телефон со мојот американски колега и се согласивме дека ќе можеме да се јавиме во секое време за да разговараме за прашања што се од наш интерес“, рече шефот на руските разузнувачи, Наришкин на државната телевизија, без да даде детали.
Наришкин, близок соработник на претседателот Владимир Путин, и Ратклиф претходно разговарале на 11 март, нивниот прв познат контакт по враќањето на Доналд Трамп во Белата куќа.
Овие два официјални телефонски разговори меѓу двајцата шефови на разузнавачките служби, руската СВР и американската ЦИА, се одвиваат во време кога дипломатските односи меѓу Москва и Вашингтон почнаа да се затоплуваат и покрај конфликтот во Украина во кој Американците формално го поддржуваат Киев.
Но, сè уште има многу меѓусебни несогласувања меѓу Москва и Вашингтон, со оглед на бројот на години екстремни тензии.
Американците, на пример, продолжуваат да им даваат важни разузнавачки информации на украинските сили по повеќе од три години голема офанзива на руската армија на украинска територија.
Во март, Сергеј Наришкин и Џон Ратклиф „се согласија да одржуваат редовни контакти“, објави руски извор, како што објави државната агенција Тасс.
