Нападот се случил вчера попладне пред ресторан откако мажите му се приближиле на Ниџелски и го критикувале за ограничувањата и одлуките воведени за време на пандемијата Ковид-19, а потоа го удирале во лице и почнале да го клоцаат, објави ТВП Ворлд.
Ниџелски денеска потврди дека бил нападнат.
„Пред неколку часа бев жртва на брутален напад. Ме претепаа двајца мажи кои извикуваа „Смрт за предавниците на татковината“. Ме удрија во лице, а потоа ме шутнаа додека лежев на земја. Целиот инцидент траеше неколку секунди пред напаѓачите да избегаат“, објави тој на платформата X.
Според соопштението од обвинителството, напаѓачите, кои биле во алкохолизирана состојба, 35-годишен и 39-годишен маж, се предале на полицијата.
Откако бил отпуштен од болница, Ниџелски рече дека нападот е поврзан со климата на непријателство околу мерките преземени за време на пандемијата и фактот дека неговата лична заштита му е укината.
„Целиот овој инцидент е резултат на толеранцијата на говорот на омраза, но и на одлуката на министерот Кирвињски (министер за внатрешни работи) да го повлече моето обезбедување и покрај бројните закани упатени до мене во јавноста“, додаде тој.
Според заменик-министерот за внатрешни работи на Полска, Чеслав Мрошчек, Ниџелски повеќе немал право на обезбедување, бидејќи заштитата законски им се дава на високи функционери само за време на нивниот мандат, со исклучок на претседателот.
Тој додаде дека Ниџелски продолжил да користи обезбедување до декември 2023 година, и покрај тоа што поднесе оставка од функцијата министер во август истата година.
Ниџелски беше министер за здравство во владата предводена од Партијата за право и правда (ПиС) од 2020 до 2023 година, под премиерот Матеуш Моравјецки. Како министер, тој беше одговорен и за мерките за време на пандемијата на коронавирусот.
