Брзината на преговорите за завршување на војната во Украина зависи од позицијата на Киев, ефикасноста на американското посредништво и ситуацијата на теренот, изјави синоќа портпаролот на Кремљ, Дмитриј Песков.
Пет месеци откако американскиот претседател Доналд Трамп дојде на власт, не се гледа крај на војната што Русија ја започна во февруари 2022 година против својот помал сосед, и покрај фактот дека тој вети во својата кампања во 2024 година дека ќе ја заврши за еден ден.
Трамп, кој ги притиска двете страни да преговараат за прекин на огнот откако беше инаугуриран во јануари, во петокот изјави дека мисли дека „нешто ќе се случи“ за да се стави крај на војната.
-Многу зависи, се разбира, од позицијата на режимот во Киев, изјави Песков за телевизијата Белорусија-1, главниот државен телевизиски канал на земјата што се граничи со Русија.
„Зависи од тоа колку ќе биде ефикасно посредништвото на Вашингтон“, рече тој, додавајќи дека ситуацијата на терен е уште еден фактор што не може да се игнорира.
Песков не даде повеќе информации за тоа што Москва очекува од Вашингтон или Киев. Москва побара Украина да отстапи повеќе земја и да престане да се снабдува со оружје од Западот, што се барања што Киев ги нарекува неприфатливи.
Иако датумот на следните преговори сè уште не е утврден, Песков рече дека Русија се надева дека тие датуми ќе бидат познати „во блиска иднина“.
По тригодишна пауза, на 16 мај и 2 јуни Украина и Русија одржаа директни разговори во Истанбул што доведе до повеќекратни размени на затвореници и враќање на мртви војници.
Мешутоа, двете земји не се доближија до договор за прекин на огнот. Нивните нацрти за мировниот договор што ги споделија на 2 јуни беа „целосно контрадикторни меморандуми“, рече рускиот претседател Владимир Путин во петокот.
Русија, која веќе контролира речиси една петтина од Украина, продолжува постепено да навлегува во оваа земја. Во последните неколку недели, таа освои делови од југоисточните украински региони Донецк и Дњепропетровск и ги интензивираше воздушните напади врз целата земја.
Турција, домаќин на последната рунда преговори, е подготвена повторно да ги угости преговарачите на завојуваните земји.
