Авионот бил пренасочен кон аеродромот во Минеаполис околу 17:30 часот по локално време - два часа по полетувањето, каде што безбедно слетал по застрашувачкиот инцидент.
Застрашувачки сведоштва
Службениците на Делта потврдиле дека авионот бил погоден од силна турбуленција, додека сведоците опишале како силата „ги фрлила патниците во воздух“, додека количката со пијалоци „летала низ кабината“.
Според веб-страницата FlightAware, авионот „пропаднал“ повеќе од 480 метри за период од 85 секунди, а патниците рекле дека имало момент кога „мислеле дека ќе се сруши“, пренесува Дејли Меил.
По драмата, летот продолжил повеќе од еден час, пред авионот безбедно да слета во Минеаполис.
„Сè уште сум во шок, беше ужасно“
Фотографиите од кабината покажуваат храна и пијалоци расфрлани по задниот дел од авионот, додека патниците велат дека стјуардесите биле „исфрлени од своите седишта“.
„Видов сè како лета низ воздухот“, изјави Џозеф Карбоне за локалните медиуми. „Никогаш не сум доживеал нешто слично“.
Тој рече дека авионот прво бил погоден од една турбуленција што ги фрлила луѓето, по што следеле втор и трет удар кои биле уште потешки. Најмалку 25 лица се повредени во инцидентот, а некои наводно претрпеле сериозни фрактури.
„Ако не бевте врзани, удиравте во таванот и паѓавте на подот. Количката исто така удираше во таванот и паѓаше, повредувајќи луѓе. Се случи неколку пати и беше ужасно“, рече Ан Клемент-Неш.
„Имаше момент кога помисливме дека паѓаме. Сè уште сум во шок, беше ужасно. Една млада жена беше фрлена двапати. Падна врз другите патници и верувам дека заврши со скршени ребра“, додаде таа.
Поддршка од службите за итни случаи
Во авионот имало вкупно 275 патници и 13 членови на екипажот, кои биле пречекани од пожарникари и медицински персонал по итното слетување.
Портпаролот на Делта изјави по инцидентот: „Благодарни сме за поддршката на службите за итни случаи вклучени во овој настан. Безбедноста на патниците е од најголема важност, а нашиот тим на Делта Кеар директно помага со сите итни потреби што можеби ги имаат.“
