Трудо ќе има приватна средба со Чарлс во неговиот имот во Норфолк, откако пристигна во Лондон за да учествува на итен одбранбен самит на европските лидери.
Кралот беше пофален за неговата поддршка на Украина, откако топло го пречека Зеленски, ден по бурната средба на украинскиот претседател со американскиот претседател Доналд Трамп.
Дипломатските напори за Украина се засилија, додека британскиот премиер Кир Стармер ги предупреди европските лидери дека се на „историска раскрсница“ и ги повика да се приклучат на неговата „коалиција на подготвените“.
Чарлс, кој го покани Трамп на втора државна посета на Обединетото Кралство, сè повеќе се гледа како обединувачка фигура низ „меката моќ“ на британската монархија, и покрај глобалните политички турбуленции.
Трамп повеќепати се закани дека ќе ја направи соседна Канада 51-ва американска држава, тврдејќи дека без значителна финансиска поддршка од САД, „таа престанува да постои како одржлива земја“.
Трудо најави дека на средбата со кралот ќе го отвори ова прашање, нагласувајќи дека „ништо не е поважно за Канаѓаните од заштитата на нашиот суверенитет и независност“.
Трамп, исто така, најави дека од утре ќе воведе нови царини за увоз на канадски стоки, оправдувајќи го тоа со загриженоста за премините на границата.
Кралот Чарлс беше критикуван за тоа што молчи во врска со овие изјави на Трамп. Поранешниот премиер на Алберта, Џејсон Кени, изјави дека кралот може да дејствува само по совет на канадската влада.
„Владата на Канада треба да побара од шефот на државата да го потврди канадскиот суверенитет“, напиша Кени на мрежата Икс.
