Следната приказна се случува во Италија, каде младите ги користат услугите на приватни превозници кои безбедно ги превезуваат од клубовите и баровите до нивните домови.
Ги делат трошоците за транспорт.
Беатрис Рамела Пеца од градот Бјела, на северот на земјата, веќе 14 години превезува млади луѓе по вечерни излегувања. Во работните денови е туристички водич и приватен возач, додека за викенд нуди ноќен превоз, особено по воведувањето на построги сообраќајни прописи.
„Младите луѓе сè повеќе ја препознаваат важноста на безбедноста и однапред го планираат својот транспорт. Покрај тоа, возрасните сега почесто користат такви услуги за да го избегнат ризикот од возење под дејство на алкохол“, изјави Беатрис.
Нејзината услуга им овозможува на групите да ги споделат трошоците за транспорт, а цените зависат од растојанието. Повеќето клиенти се млади луѓе на возраст од 18 до 22 години.
„Понекогаш возам и малолетници, особено за роденденски забави, што може да биде најголем предизвик бидејќи младите тешко ги проценуваат своите граници“, објаснува таа.
„Ноќното возење е одговорна работа“
Популарни дестинации се местата со богат ноќен живот, каде што трошоците може да одат и до 150 евра по лице, без превоз.
„Секогаш се прашувам од каде им се толку пари, веројатно од дарежливите баби и дедовци“, додава Беатрис низ смеа.
Ноќната работа носи и предизвици. Дење одмара, а во возилото има ќебиња и топол чај за клиентите, пренесува Вечерњи.хр.
„Ноќното возење е одговорна работа. Не се работи само за алкохолот, туку и за замор. Минатата година, еден млад човек што го познавав умре затоа што неговиот пријател заспал на воланот. Тоа се трагедии кои треба да се спречат“, посочува жителката на Бјела.
Иако најчесто чека клиенти во својот автомобил, таа е свесна за безбедносните ризици, па затоа се паркира на добро осветлени места, покриени со камери.
Нејзината услуга станува сè попопуларна, особено во градовите како Милано, каде што ноќниот живот трае до раните утрински часови.
„Младите луѓе сè повеќе сфаќаат дека забавата не треба да значи ризик. Затоа е важно да се има безбедно враќање дома“, заклучува Беатрис.
