Годишното зголемување од 10 милијарди долари на 100,2 милијарди долари е потрошено за модернизација и, во некои случаи, проширување на нуклеарните арсенали, според податоците на Меѓународната кампања за укинување на нуклеарното оружје, глобална коалиција на граѓанското општество која бара целосно уништување на атомското оружје.
„Нуклеарно вооружените држави би можеле да уплатат во буџетот на Обединетите нации 28 пати поголем износ од тоа што потрошиле за изградба и одржување на нуклеарно оружје во 2024 година“, се вели во извештајот.
Соединетите Американски Држави забележаа најголемо годишно зголемување на нуклеарните трошоци во 2024 година, од 5,3 милијарди долари, а нивните вкупни трошоци од 56,8 милијарди долари ги надминаа комбинираните трошоци на сите други нуклеарни држави, се вели во извештајот.
Кина потроши 12,5 милијарди долари, по што следува Обединетото Кралство со 10,4 милијарди долари, што е зголемување од 2,2 милијарди долари, по што следат Франција, Индија, Израел, Северна Кореја, Пакистан и Русија, соопшти Меѓународната кампања за укинување на нуклеарното оружје.
„Во однос на видот на зголемување на трошоците во Обединетото Кралство и Франција, мислам дека секако видовме, барем во реториката на политичките лидери, референца на тековната војна во Украина, на тензиите, и тоа би можело да игра улога“, рече Алиша Сандерс-Закре, координаторка за политика и истражување на Меѓународната кампања за укинување на нуклеарното оружје, пред новинарите на брифинг во Женева.
Таа додаде дека зголемувањето на нуклеарните трошоци е повеќе поттикнато од трошоците за сервисирање на долгорочните договори и растечките трошоци за развој на системи за испорака на нуклеарно оружје отколку од моменталните безбедносни проблеми./МИА
