Претседателката на Европската комисија, Урсула фон дер Лајен, денес изјави дека имала „многу добар“ разговор со американскиот претседател Доналд Трамп, украинскиот претседател Володимир Зеленски и европските лидери пред претстојниот самит меѓу Трамп и рускиот претседател Владимир Путин во Алјаска.
Според неа, тие разговарале за подготовките за билатералната средба во Алјаска и го нагласиле единството на Западот во поддршката на Украина.
„Разменивме мислења за претстојната билатерална средба во Алјаска. Денес, Европа, САД и НАТО го зајакнаа својот заеднички јазик за Украина. Ќе продолжиме да дејствуваме во тесна координација. Никој не сака мир повеќе од нас - праведен и траен мир“, изјави претседателката на Европската комисија на платформата X.
Германскиот канцелар Фридрих Мерц денес изјави дека европските лидери сакаат Трамп да успее за време на неговите разговори со рускиот претседател Владимир Путин во Алјаска во петок, наведувајќи дека европската и украинската безбедност мора да бидат приоритет во преговорите.
„Му го ставивме тоа јасно до знаење на Трамп. „Првото нешто што мора да се дискутира е прекин на огнот“, рече Мерц на заедничката прес-конференција со украинскиот претседател Володимир Зеленски, по разговорите со американскиот претседател Доналд Трамп, претседателот на Европскиот совет Антонио Коста и европските лидери, објави Ројтерс.
Мерц рече дека го задржува ставот на Европа дека границите не смеат да се менуваат со сила и дека нема прашање за признавање на територии контролирани од Русија.
„Трамп во голема мера се согласува со овој став“, рече Мерц.
Тој го оцени разговорот како добар и конструктивен и изрази надеж дека може да се постигне мир во Украина.
Францускиот претседател Емануел Макрон рече дека за време на заедничкиот разговор со Зеленски, претседателот на Европскиот совет Антонио Коста и лидерите на Европската унија, Трамп изјавил дека сите територијални прашања, имено териториите што официјално ѝ припаѓаат на Украина, мора да бидат предмет на преговори со Украина, објави „Ле Фигаро“.
