Воздухопловната база Холоман во близина на Аламогордо, град во јужниот дел на Ново Мексико, беше ставена под блокада во вторникот околу 17:30 часот по локално време по извештаите за активен стрелец, се наведува во соопштението на војската. Блокадата беше укината набрзо откако припадниците на безбедносните сили потврдија дека подрачјето е безбедно, пренесува Ју-Ес-Еј Тудеј.
„Итните служби реагираат на ситуацијата и во моментов нема закана“, се вели во соопштението на војската. Воените претставници не дадоа повеќе детали за инцидентот.
Воздухопловната база Холоман е основана во 1942 година како аеродром западно од Аламогордо, околу 145 километри северно од Ел Пасо во Тексас. Базата првенствено е седиште на 49-то крило, единица на Военото воздухопловство на САД, која ги поддржува целите на националната безбедност со распоредување ширум светот во мирнодопски и воени операции. Крилото обезбедува припадници на воздухопловните и вселенските сили, ги обучува пилотите на авионите F-16 Fighting Falcon, како и пилотите и операторите на сензори на беспилотните летала MQ-9 Reaper.
Припадниците на таа единица учествувале во Втората светска војна, Корејската војна, конфликтите во југоисточна и југозападна Азија, како и во НАТО бомбардирањето на СР Југославија кое траеше 78 дена.
