Во директен пренос на Си-ен-ен, снимен е драматичен момент кога новинар на Си-ен-ен бил принуден да побара засолниште во моментот на известувањето, додека фрагменти од ирански ракети паѓале над Тел Авив.
Репортерот на Си-ен-ен известуваше во живо од покрив во Тел Авив кога Иран лансираше стотици ракети кон Израел.
На почетокот на јавувањето, фрагменти од ракети пресретнати од израелскиот противракетен систем паѓаат во Тел Авив, но доста далеку од локацијата каде што се наоѓа новинарот. Како што напредува предупредувањето, ракетите се приближуваат, како и фрагментите што паѓаат од небото.
Во тој момент ситуацијата станува доста сериозна.
„Мораме да се симнеме од покривот“, вели во еден момент новинарот. „О, Боже, ова беше блиску, тие ни паѓаат многу блиску. Мораме да влеземе внатре“, се слуша во директниот пренос.
„Те молам, побарај засолниште“, му вели водителката, од другата страна.
После тоа се слуша само тишина, а јавувањето набрзо престанува.
Илјадници Израелци во Тел Авив се упатија кон засолништата минатата ноќ откако Иран изврши одмазднички напад. Дури и претходно во вторникот, Вашингтон предупреди дека ќе има напад со балистички ракети од Иран. Блискиот Исток е на работ на голем регионален конфликт, а иранскиот напад дојде само еден ден откако израелската армија започна копнена инвазија на јужен Либан, дом на бројни упоришта на терористичката организација Хезболах.
