Шпанија ја совлада Франција со 5:4 во вистински голеадерски спектакл во полуфиналето на Лигата на нации и обезбеди место во големото финале каде што ќе се сретне со Португалија. Натпреварот во Штутгарт понуди драма до самиот крај и дури девет голови, но Шпанците успеаја да го задржат водството и да слават.
По натпреварот, разочарувањето кај француската репрезентација беше големо, особено кај ѕвездата Килијан Мбапе, кој отворено се пожали на судиската надокнада:
„Не се согласувам со судијата со вистинското време за играта. Ако е најавена петминутна надокнада, тогаш треба да се игра пет минути.
На прв поглед, мислам дека одигравме добро. Имавме акции што одамна не сме ги виделе. Сепак, имавме пад од десет минути во првото полувреме и тие постигнаа два гола. Истото ни се случи и во второто полувреме. Не бевме доследни цел натпревар. Но, има напредок. Секако дека сме лути и фрустрирани,“ заврши Мбапе.
