Токму кога работите се консолидираа на „Олд Трафорд“ под водство на Мајкл Карик, сосема неочекувано се случи фудбалски земјотрес во женскиот тим на Манчестер Јунајтед. Најуспешниот менаџер во историјата на клубот, Марк Скинер, повеќе нема да ги предводи „Црвените ѓаволки“!
Марк Скинер (43) и клубот официјално се согласија на меѓусебен раскин по петгодишна соработка, само еден месец пред почетокот на новата сезона. Иако Скинер минатото лето потпиша двегодишно продолжување на договорот, се појавија несогласувања околу трансфер политиката на клубот. Почитуваниот англиски тренер јавно апелираше во неколку наврати во изминатите месеци за поголеми инвестиции и засилувања со цел тимот да се справи со водечките европски и англиски ривали. Сепак, ова лето раководството на клубот одлучи да го промени курсот и да ја насочи стратегијата кон развој на млади и домашни играчи.
Незадоволството од скромниот летен преоден рок и разликата во визијата за иднината резултираа со разговори во кои Скинер понуди оставка, а на крајот беше потпишан меѓусебен раскин.
Скинер е најуспешниот менаџер во историјата на женскиот тим на Манчестер Јунајтед. Тој го презеде тимот во јули 2021 година наместо Кејси Стоуни и остави длабок белег за пет години. Со освојувањето на ФА Купот во 2024 година со убедлива победа над Тотенхем (4:0), тој го донесе првиот трофеј во историјата на женскиот клуб. Исто така, во 2023 година, тој го одведе тимот до второто место во лигата, што е најдобар пласман во историјата на клубот, а минатата сезона ги одведе „Ѓаволките“ до четвртфиналето на Лигата на шампионите.
