Играчот од средниот ред на Манчестер Сити, Кевин Де Брујне стана предмет на многу трансфер шпекулации по веста дека ќе ги напушти „граѓаните“ на крајот од сезоната. Една од опциите за Белгиецот е кариерата да ја продолжи во САД.
Според „Мирор“, Интер Мајами подготвува понуда за Де Брујне, но за неговиот потпис ќе мора да конкурира со клубови од Саудиска Арабија.
Претседателот на Интер Мајами Дејвид Бекам сака да го види Де Брујне покрај Лионел Меси и останатите ѕвезди: Луис Суарез, Серхио Бускетс и Жорди Алба. Истовремено, постои и опција клубот да се засили на лето со Анхел Ди Марија, кој е близок пријател со Меси.
Де Брујне неодамна беше поврзуван со најновиот клуб во фудбалската голема лига, Сан Диего ФК, но спортскиот директор Тајлер Хепс изјави дека таквата зделка не може да се направи од финансиски причини.
Де Брујне му се приклучи на Манчестер Сити во 2015 година и оттогаш забележа 413 настапи, постигнувајќи 106 гола и 174 асистенции за „граѓаните“. Шест пати ја освои титулата во Премиер лигата, два пати ФА Купот, пет пати Купот Карабао, три пати Комјунити Шилд и еднаш трофејот во Лигата на шампионите.
