Куновска за СДСМ: ТИЕ КОИ БЕА КАЗНЕТИ НЕ МОЖЕ ДА БИДАТ НОВ КВАЛИТЕТ, еден губитник се заменува со друг губитник

Поранешната пратеничка од СДСМ и носител на партиски фунцкии, Софија Куновска вели дека од страна гледано во СДСМ изгледа дека целата ситуација е резултат на раслојување, апатија и револт од потенцијални партиски пазарења со кои поединци ќе си го продолжат партискиот живот на вискоки позиции, не водејќи сметка за тоа дека местото за опозициско делување нема да остане долго непополнето.

Според Куновска истите пратеници кои беа казнети на последните избори не можат да бидат нов квалитет, нова надеж или ново лице на СДСМ.

-Ако не можеа да бидат од полза за граѓаните од позиција на власт, од опозиција уште помалку. СДСМ може да заздравува и да го врати сонот за победнички патеки само со енергични, бистри и искрени луѓе неоптоварени од клиентелизам и дамки од минатото, вели таа за <a href="https://lokalno.mk/kunovska-sdsm-odi-po-pat-od-koj-nema-vrakjanje-a-toa-ne-e-dobro-ne-samo-za-sdsm-tuku-pred-se-za-drzhavata/">Локално</a>.

Според неа, на внатрепартиските избори на 30-ти јуни ќе се прави избор на кој еден губитник треба да се замени со друг губитник. Тврди дека тоа е повторно во режија на Заев и оттаму смета дека внатрепартиските избори треба да се одложат на неодредено време.

-Конгресот треба да донесе одлука за преодно техничко раководство кое ќе носи вонредни одлуки за внатрешни реформи кои ќе обезбедат минимум гаранции дека СДСМ има внатрешен потенцијал да се промени на подобро. Во спротивно, треба да бидеме искрени, следи исчезнување на можноста моќен СДСМ со габарит за враќање на власт воопшто да постои на политичката сцена. Тоа е реалноста му се допаѓала таа некому или не, рече Куновска.

Таа истакна дека луѓето кои ја доведоа СДСМ до овој пораз се проблем, а не решение за СДСМ.

Би сакала да можеше од сите доскорешни функционери да се издвои некој со јасни ставови, дистанца од корумпираните поединци од власта, што можеби ќе доведеше до внатрешно освестување. За жал, сите си ги следеа само своите кариери и можноста за опстанок во хиерархијата на партијата, без оглед дали е СДСМ победнички или губитнички. Да се јавеше барем еден кој ќе беше вокален во партијата или надвор од неа и ќе изразеше став поинаков од партискиот за измената на членот 353 од КЗ, за покачувањето на платите на функционерите, за Бехтел и Енка и низа други скандали, можеби ќе гледавме денес со други очи на него, нагласува Куновска, изјави Куновска.