Имено, властите регистрираа случај на намерно палење, а беспилотни летала успеаја да фатат докази за злосторството.
Албанскиот премиер Еди Рама објави видео на Фејсбук направено од дрон на албанското воздухопловство, кое го прикажува моментот на намерно палење.
Видеото со Албанец како пали пожар е снимено од турски дрон „Бајрактар“, а Рама предупреди дека ваквите дејствија претставуваат не само злосторство, туку и предавство.
„Намерното палење не е само злосторство, туку и предавство на нашата земја и иднината на нашите деца. Еве видео од намерно палење снимено денес од беспилотни летала на воздухопловството. Полицијата е на терен за да ги изведе пред лицето на правдата сите што си играат со пламен на заеднички имот“, напиша Рама, најавувајќи дека Албанија ќе мора да „го изедначи палењето со убиство во Кривичниот законик“.
Според албанското Министерство за одбрана, стотици пожарникари и војници ги изгаснале повеќето од речиси 40-те пожари што избувнаа во изминатите 24 часа, но повеќе од десетина се уште се активни. Од почетокот на јули, речиси 34.000 хектари изгореа низ целата земја, според Европскиот информативен систем за шумски пожари (EFFIS).
Полицијата вели дека во последните недели се подметнати бројни пожари и дека повеќе од 20 лица се уапсени.
Најкритична ситуација во моментов е во јужниот крајбрежен регион Финика, на околу 160 километри од Тирана. Околу десет лица се евакуирани, а неколку куќи се целосно изгорени, според локалните медиуми.
Околу 800 албански војници се вклучени во гаснењето на пожарот, како и воени авиони и хеликоптери од соседните земји.
Пожари беснеат и во Црна Гора, Грција и Србија, кои се соочуваат со екстремно високи температури, суша и силни ветрови. Противпожарните служби низ целиот регион се под максимален притисок, а штетата врз природата, имотот и локалните заедници е огромна.
