Неколку високи функционери на грчката влада поднесоа оставки откако нивните имиња беа споменати во истрагата на Канцеларијата на европскиот јавен обвинител (ЕЈО) за измама од повеќе милиони евра во врска со европските земјоделски фондови, објави „Катимерини“.
Оставките ги дадоа министерот за миграција Макис Воридис, заменик-министерот за надворешни работи Тасос Хачивасилеу, заменик-министерот за рурален развој Дионисис Стаменитис, заменик-министерот за дигитално управување Христос Букорос и генералниот секретар за рурален развој и храна Јоргос Стратакос.
Според податоците од досиејата на ЕЈО, десетици лица, вклучувајќи државни функционери, пратеници и функционери од државната Агенција за плаќање и контрола на заедничките земјоделски субвенции (ОПЕКЕПЕ), која е одговорна за распределба на средствата од ЕУ, учествувале во систематска злоупотреба на субвенции за непостоечки пасишта и фиктивни земјоделски активности.
Средствата наводно биле задржувани од легитимните корисници.
ЕЈО минатата недела достави информации до грчкиот парламент за наводната вмешаност на поранешните министри за земјоделство Макис Воридис и Лефтерис Авгенакис.
И двајцата ги негираа обвинувањата.
Истрагата откри прислушувани разговори во кои високи функционери разговараа за начини за отстранување на европски обвинители од истрагата, како и за политичко влијание врз исплатите на субвенции.
Исто така, се вели дека поранешните претседатели на ОПЕКЕПЕ биле отпуштени поради обид за блокирање на сомнителни плаќања.
Досието од 3.000 страници ги наведува 15 пратеници - 13 од владејачката партија Нова демократија (НД), по еден од ПАСОК и Сириза - како и бројни регионални и поранешни државни функционери.
Порано овој месец, Европската комисија ја казни Грција со 400 милиони евра за неуспешно управување и контрола на средствата на ЕУ.
Грчката влада објави дека ќе го затвори ОПЕКЕПЕ до крајот на оваа година и дека идните исплати ќе се вршат преку Независниот орган за јавни приходи.
Се очекуваат и дополнителни финансиски казни.
