Денеска (15 април 2025 година), заменик генералниот секретар на НАТО, Радмила Шекеринска, беше домаќин на претседавачот и членовите на Трипартитното претседателство на Босна и Херцеговина, Жељко Цвијановиќ, Жељко Комшиќ и Денис Беќировиќ, во седиштето на НАТО. Тие разменија мислења со постојаните претставници на сојузниците за најновите случувања во земјата и во регионот, како и за партнерството на НАТО со Босна и Херцеговина.
Северноатлантскиот совет на НАТО ја подвлече трајната посветеност на НАТО за стабилноста во Босна и Херцеговина, за територијалниот интегритет и суверенитет на земјата, во согласност со Дејтонскиот мировен договор и за нашата трајна соработка со Босна и Херцеговина. За време на дискусијата беше повторено дека Алијансата останува загрижена за неодамнешните случувања и нивните негативни импликации, вклучително и за уставниот поредок на земјата и функционалноста на државните институции.
Наспроти ова, заменик-генералниот секретар потврди дека „мора да се почитува Дејтонскиот мировен договор. Тој е камен-темелник на стабилноста и државната архитектура на Босна и Херцеговина“. Таа, исто така, подвлече дека „НАТО останува тесно усогласен со своите меѓународни партнери“, вклучително и операцијата Алтеа и дека НАТО „нема да прифати каков било вид безбедносен вакуум во Босна и Херцеговина. И нема да дозволиме тешко стекнатиот мир да биде загрозен“.
Заменик-генералниот секретар Шекеринска ја повтори поддршката на Алијансата за напредокот на Босна и Херцеговина „на нејзиниот европски и евроатлантски пат“ и истакна дека е важно „да се надградува врз оваа основа, за доброто на сите што живеат таму“, информира НАТО.
