Во Газа избувнуваат меѓусебни борби, бидејќи залихите со храна речиси исчезнаа, изјави денеска официјален претставник на Обединетите нации, додека целосната блокада на залихите на Газа од страна на Израел трае веќе 60 дена.
Од 2 март, Израел целосно ги прекина залихите за 2,3 милиони жители на Појасот Газа, а залихите од храна складирани за време на прекинот на огнот на почетокот на годината речиси исчезнаа. Ова е најдолгата блокада со која се соочил Појасот Газа.
Палестинските жители и хуманитарни работници изјавија дека завчера имало најмалку пет грабежи низ енклавата.
Олга Черевко, хуманитарен работник во Канцеларијата за хуманитарни работи на ОН во градот Газа, изјави дека насилството во заедницата околу залихите се интензивирало.
Таа им изјави на новинарите дека во петокот била сведок на една таква тепачка.
„Залихите се намалуваат додека беснее војната; залихите од храна сега во голема мерка се исчезнати. Пристапот до вода стана невозможен. Всушност, додека зборувам, токму пред оваа зграда, луѓето се борат за вода. Камион за вода штотуку пристигна и луѓето меѓусебно се убиваат за вода“, изјави таа на прес-конференција во Женева преку видео врска.
Некои хуманитарни групи велат дека веќе им снемало залихи од храна во изминатата недела и дека јавните кујни се во опасност од затворање.
Црвениот крст соопшти дека хуманитарниот одговор во Газа е на работ на „тотален колапс“.
Израел претходно негираше дека Газа се соочува со криза со глад и тврди дека сè уште има доволно помош за одржување на населението.
