Изложбата ќе биде отворена вечерва во 19 часот во Кинотека на Македонија, а ќе бидат претставени фотографии од членовите на Скопското астрономско друштво направени на различни локации низ државата.
Целта, како што најавуваат организаторите, е да се пренесат убавините и инспиративните глетки кои можат да се забележат на ноќното небо со голо око, фотоапарат или телескоп.
Преку астрофотографиите ќе бидат претставени најразлични небесни објекти: галаксии, маглини, ѕвездени јата, објекти од Сончевиот систем, вештачки сателити, како и пејсажни фотографии со астрономски мотиви.
Влезот е бесплатен.
„Скопско астрономско друштво“ е здружение на љубители на астрономијата, основано 1998 година во Скопје. Целите и определбите на друштвото се ширење и популаризација на астрономијата како наука и обединување на сите љубители на астрономијата во нивната заедничка потрага по повеќе знаење, дружење и ведро небо.
