Извршниот директор на водечката државна Втора германска телевизија - 2ДФ, Норберт Химлер побара строги правила за употреба на слики и материјали создадени со помош на вештачка интелигенција, по неодамнешните контроверзии околу употребата на такви материјали како илустрација во вести на информативната програма на радиодифузерот, јави ДПА.
- Може да користиме само слики чие потекло можеме да го утврдиме без никакво сомнение. И ако не сме целосно сигурни, мора да го кажеме тоа - тогаш мора да го етикетираме, или најдобро е воопшто да не го користиме, рече Химлер вчера на настан на компанијата во Магдебург, во покраината Саксонија-Анхалт. - Ако се направат грешки, ќе ја преземеме одговорноста за нив. Потоа ќе мора да се справиме со нив и ќе треба да учиме од нив, рече Химлер.
Пред околу една недела, 2ДФ предизвика контроверзии со вести за американската Агенција за имиграција и царинска контрола (ИЦЕ), бидејќи уредничкиот тим искористи неколку слики создадени со ВИ.
Телевизиската мрежа подоцна ги призна грешките и им се извини на гледачите. Исто така, во петокот го отпушти својот дописник од Њујорк, Никола Албрехт. Химлер, исто така, нагласи дека демократскиот процес на формирање мислења зависи од тоа граѓаните да можат да се потпрат на независно, избалансирано и транспарентно новинарство.
