Неговата сопруга Сара Рајт Олсен ги објави потресните фотографии на Инстаграм.
„Невозможно е да се опишат овие последни денови со зборови. Заедно сме, безбедни и опкружени со љубов. Ја загубивме куќата. Тоа беше една од првите локации што изгоре во пожарот. Нашите деца рекоа „ова е местото каде што сите ги направивме нашите први чекори“ „Толку е тешко да се збогуваме со нашиот прекрасен град, нашето училиште и ова место што го сакаме 13 години“, напиша таа.
„Благодарни сме што сме заедно и благодарни сме за љубовта што ни ја испраќате. Добивме еден куп пораки од пријатели кои ни ги нудат своите домови, храна, облека, прегратки, работи за децата и поддршка. Ви благодариме, тоа ни значи многу“, заклучи Сара.
На првата фотографија се гледа дека Ерик со сопругата и нивните три деца - синот Вајат Оливер и ќерките Есме Оливија и Винтер Стори - стојат пред оградата и гледаат во густиот чад на хоризонтот. Тогаш Сара објавила фотографии од нивната уништена куќа, која целосно изгорела во пожарот.
„Не можам да замислам како се чувствувате во моментов. Вие сте силно и блиско семејство, знам дека ќе закрепнете, но тоа секако не го намалува шокот што го чувствувате“, порача актерката Робин Тани од серијата Mentalist. „Ти испраќам многу љубов, сестро“, напиша актерот Вилмер Валдерама од „Тоа е филм од 70-тите“.
Олсен е дел од долгата листа на познати личности кои ги изгубиле своите домови. На неа се најдоа и Мел Гибсон, Парис Хилтон, Били Кристал, Јуџин Леви, Мајлс Телер, Џон Гудман, Ана Фарис, Адам Броди и Лејтон Мистер, Спенсер Прат и Хајди Монтаг, Кенди Спелинг и Џеф Бриџис.
Да потсетиме, една недела откако шумските пожари почнаа да ја опустошуваат областа на Лос Анџелес, пожарникарите постигнаа напредок во контролирањето на пожарот. Со временската прогноза за следните неколку дена – со слабеење на ветровите и опаѓање на температурите – многумина се надеваат дека најлошото од оваа катастрофа е минато. Сепак, пожарникарите се уште се на готовност бидејќи опасните ветрови од Санта Ана во секој момент можат да ја искомплицираат ситуацијата.
