Во него, легендарниот музичар и поранешен член на Битлси се враќа на детството поминато во Ливерпул, пишува Ројтерс.
Сеќавањата како главна инспирација
Албумот е насловен „The Boys of Dungeon Lane“, по стих од синглот „Days We Left Behind“ кој беше објавен минатата недела. Во изјава, Мекартни ја опиша песната како „песна на спомени“.
„Токму размислував за тоа, за деновите што се оставени зад нас. Често се прашувам дали пишувам само за минатото, но потоа си мислам: па за што друго да пишувам? Сето тоа се само многу спомени од Ливерпул“, рече 83-годишниот музичар.
Според изјавата објавена на неговата официјална веб-страница, песните евоцираат спомени од растењето во повоениот Ливерпул, неговите родители и неговите авантури со колегите од бендот Џорџ Харисон и Џон Ленон, пред Битлси да постигнат светска слава.
Приказни од работничката класа
„Во средината на песната има дел за Џон и улицата Фортлин, каде што живеев. Данџен Лејн е веднаш зад аголот“, објасни Мекартни за синглот „Days We Left Behind“. „Живеев во населба наречена Спик, која беше претежно населена со работничка класа. Немавме многу, но тоа не беше важно бидејќи луѓето беа одлични, па дури и не забележувавте дека ви недостасува нешто“, додаде тој.
Нов албум снимен за време на турнејата
Мекартни соработуваше со продуцентот Ендру Ват на албумот, кој вклучува носталгични песни и нови љубовни балади. Материјалот е снимен во Лос Анџелес и Сасекс, за време на паузите помеѓу настапите на неговата светска турнеја.
„The Boys of Dungeon Lane“ е осумнаесеттиот соло албум во богатата кариера на Пол Мекартни.
