„Здраво на сите! Имам неколку возбудливи вести да ги споделам со вас. Пишувам книга, со голема помош од Мајк Флеминг Помладиот. Го почнавме ова патување пред околу шест месеци и со возбуда објавувам дека книгата ќе биде објавена на 6 октомври“, напиша холивудскиот актер до своето видеообраќање.
Глумецот и продуцент од Њу Џерси, кој во септември лани го прослави 81. роденден, натаму вели дека сѐ тоа му вратило многу спомени, и оти сѐ уште помни доволно.
- Има многу што да се каже - пред да заборавам... Се надевам, ќе уживате читајќи ја и ќе ви даде мал увид во она што го правев изминативе над 80 години, порача тој.
Подоцна, во изјава за американските медиуми, тој рече дека нема да прескокне ништо во својата книга.
- По години прашување, конечно решив дека е време да ја раскажам мојата приказна според мои услови. Не преку кадар од филмското платно, ниту обликуван од наслови и бројки на билетарниците, туку онаа вистинската работа. Живеев живот кој беше и јавен и длабоко приватен, а во тоа има голема разлика. Ова е приказната за тоа од каде доаѓам, со што се соочив и изборот што го направив. Славата понекогаш може да ја засени вистината, а ова е мој обид да ја вратам во фокусот, изјави Даглас.
Холивудскиот ветеран зад себе има улоги во над 70 филмски и ТВ-проекти, како и два „Оскари“ и 60-тина други награди. Минатата 2025 година беше актуелен со семејната драма „Поглед низ водата“ (Looking Through Water), а ќе глуми и во историската мини серија „Реган и Горбачев“ којашто сѐ уште не е завршена.
