Францускиот претставник на овогодинешниот Избор за песна на Евровизија, <b>Слимане</b>, е обвинет за сексуално вознемирување, јавуваат француските медиуми.
Во извештајот поднесен до државното обвинителство во Сент Етјен се наведува дека нападот наводно се случил во декември 2023 година, кога Слимане настапил на концерт во Сент Етјен.
Според изворите, тужбата ја поднел еден од поранешните техничари на пејачот кој работел со него на турнеја. Во тужбата навел дека се се случило на 17 декември 2023 година, по концертот.
Рекол дека пејачот го заробил крај некој ѕид и потоа го замолил да биде со него. Според неговото сведочење, Слимане инсистирал да одат во соблекувалната за да имаат секс, а неговиот поранешен техничар рекол дека не го интересира и дека е хетеросексуалец и оженет.
Откако го одбил, рекол дека во текот на ноќта добил неколку десетици пораки од Слимане. Техничарот потоа ја известил компанијата која го вработила, а тие, според француските медиуми, ги повлекле сите техничари кои работеле со пејачот на турнејата.
Јавниот обвинител на Сент Етјен, Дејвид Шармак, рекол дека адвокатот на жртвата планира да му презентира докази.
„Ги чекам тие документи, па потоа да ги сослушаме жртвата и сторителот“, рекол тој.
Да потсетиме, Слимане на Евровизија ја изведе песната „Mon Amour“, а по настапот рече: „Соединети од музиката, но за љубов, за мир.“
