„Тука сме за да бидеме конструктивни партнери“, рече Трудо во својата прва јавна изјава откако Трамп предложи дека може да воведе царини од 25 отсто на канадскиот увоз во рок од неколку дена, објави Ројтерс.
Иако Трамп се закани дека ќе воведе казнени царини за Канада на неговиот прв ден на функцијата, на денот на инаугурацијата тој избра да објави план за проучување на наводните нефер трговски практики.
Тој потпиша извршна наредба со која се наложува студијата да биде завршена до 1 април.
Сепак, доцна вчера вечерта, при потпишувањето на оваа и другите извршни наредби, Трамп рече дека размислува за воведување царини од 25 отсто за Канада и Мексико почнувајќи од 1 февруари.
„Размислуваме за царина од 25 отсто за Мексико и Канада, бидејќи тие им дозволуваат на огромен број луѓе - Канада е исто така многу лош престапник - огромен број луѓе и фентанил да дојдат во Соединетите држави“, им рече Трамп на новинарите во Белата куќа.
Трудо рече дека Канада веќе била во ваква ситуација за време на првата администрација на Трамп.
„Секогаш ќе има одредена количина на непредвидливост и реторика од оваа администрација“, рече тој.
Трудо рече дека фокусот на неговата влада останува на избегнување царини - но ако тие напори не успеат, Канада ќе одговори и „сите опции се на маса“.
„Нашиот одговор ќе биде силен, брз и одмерен, но многу цврст. Целта ќе биде да се отстранат овие тарифи што е можно побрзо“, рече Трудо.
