„Секој Евреин кој гласа за Зохран Мамдани е глупав човек!!!“, напиша американскиот претседател на својата платформа Truth Social, оценувајќи дека главниот фаворит на изборите „ги мрази Евреите“. Зохран Мамдани, 34-годишен муслимански демократски социјалист роден во Уганда, е страствен застапник на палестинската кауза, а неговите ставови за Израел и војната во Газа се непријателски прифатени од дел од еврејската заедница во Њујорк.
Син на индиска режисерка и угандански политичар, тој ја поддржува кампањата за бојкот, одземање инвестиции и санкции против Израел уште од студентските денови. Во обид да ја смири јавноста, тој постојано зазема силен став против антисемитизмот во последните месеци.
Њујорк е градот со најголемо еврејско население надвор од Израел. Се очекува жителите на Њујорк денеска да го изберат левичарот Мамдани за градоначалник, отворајќи нов фронт против американскиот претседател Доналд Трамп и зголемувајќи ги стравувањата дека претседателот ќе се одмазди против градот каде што се прослави.
Трамп вчера се закани дека ќе го прекине федералното финансирање за Њујорк доколку демократот Мамдани победи на градоначалничката трка. На својата платформа Truth Social, Трамп го нарече 34-годишниот кандидат „комунист“ кој ќе го остави градот со „НУЛА шанси за успех, па дури и преживување“.
Мамдани води со седум поени разлика со 41 процент во најновата анкета на AtlasIntel. Зад 34-годишниот Мамдани е поранешниот гувернер на државата Ендру Куомо со 34 проценти, кого Доналд Трамп го поддржува и вели дека е „помало зло“.
